天氣涼咗咁多，又係時候烚烚下。不過就算有靚靚火鍋料，都會面對其中一大煩惱（肥牛除外），就係到底烚幾耐先夠熟得嚟又夠好食？

湯底篇：牛尾夠油香　滾完食得返

工欲善其事，必先利其器，湯底一樣係火鍋嘅基本而最關鍵嘅地方！除咗時下流行嘅麻辣湯底，一般要令湯底香味濃郁，都會加入唔同種類嘅連骨肉類。小編今次就介紹一款牛尾蕃茄湯底。

蕃茄本身係眾多蔬果之中比較容易出味，所以都經常出現喺火鍋湯底。不過熬湯需時，除咗自己花時間熬湯之外，小編有時都會用啲現成蕃茄湯，味道有時仲濃過自己煮！

用牛尾嘅好處一來係因為本身油脂充足，牛香好容易融入湯底，亦都因為耐煮，出完味依然非常好食，最啱留到中尾段慢慢品嘗。再加上蕃茄牛尾湯本身就幾有西餐feel，打個邊爐都有fusion感覺，真係食得零舍過癮。

鮑魚篇：涮生鮑需時　熟鮑快靚正

入戲肉喇！一般嚟講，大家梗係用急凍鮑魚嚟打邊爐，所以小編今次都集中講急凍鮑。鮑魚肉質比較堅韌厚實，好多時候都用嚟煲老火湯，如果打邊爐，唔難想像，都要烚返咁上下時間。以澳洲中BB青邊鮑為例，建議洗乾淨之後涮煮大約半個鐘，先可以確保完全煮熟。

但係要食得暢快，梗係夾完一件又一件最爽！如果講求效率，小編就建議大家可以試下買預先煮熟嘅急凍鮑魚。以紐西蘭熟黑翡翠鮑魚為例，切片烚30秒就得，即烚即食即爽！

貝類篇：生蠔易縮水 3分鐘啱啱好

小編打邊爐一食生蠔就會好忐忑，因為時間真係好難預－烚得太短時間，好容易中心位置仲係凍冰冰；烚得太耐，又怕縮水縮到失埋蹤。其實就算係2L特大日本廣島蠔，最理想嘅烚煮時間大約係3分鐘，所以千祈唔好烚過龍呀！

至於帆立貝又應該煮幾耐？以2S級特大帆立貝計，大約烚2分鐘就可以，仲要係唔使解凍計，真係話咁快搞掂！

海參篇：過熟易瀉身　90秒起「撈」

海參肉質一般比較軟身，未煮同煮好外表分別唔會太大，但係煮過龍又會容易瀉身，所以唔係咁易處理。以急凍彈牙小禿參為例，其實煮大約1分半鐘就啱啱好，但記得煮之前要先洗淨除腸。

至於龍蝦，其實唔算難煮，開邊煮大概3分鐘，見到龍蝦肉色澤變得實淨就食得。不過記得要預先解凍呀，咁先可以確保肉質堅實，美味可口。